Haragiari eta haren deribatuei aplikatutako kontserbazio-metodoak
Hozkuntza
Haragia kontserbatzeko tratamendu baliagarrienetako bat da. Sistema horrek bere kalitateari eusten dio denboraldi jakin batean, eta denbora hori espeziearen araberakoa da. Haragia hoztu egin behar da animalia hiltzen denetik kontsumitzen den arte, 0º eta 5ºC arteko tenperaturan; hau da, hotz-katea mantendu egin behar da hiltegian, garraiatzean, harategian eta etxean. Haragia hozteko zenbat eta denbora gutxiago behar izan, orduan eta aukera gutxiago dago germenak ugaltzeko. Haragi freskoa ez da giroko tenperaturan eduki behar, ezta neguan ere.
Aholkuak etxean
Haragia ontzi itxi batean sartzea edo aluminiozko edo plastikozko paperez estaltzea komeni da. Elikagai freskoaren kontserbazioa hobetzea, elikagai freskoak aireko oxigenoarekin edo beste elikagai batzuekin kontaktuan egoteagatik alterazioak saihestea, germenek eragindako kutsadura prebenitzea eta usainak nahastea saihestea dira helburuak. Elikagai batzuen eta besteen arteko kutsadura gurutzatua prebenitzeko, hozkailuaren beheko aldean elikagai gordinak jarri behar dira, eta, gainean, prestatuak. Era berean, elikagaiak ez aldatzeko, hozkailuaren tenperatura (0 ºC eta 5 ºC artean) eta hezetasuna erregulatu behar dira, eta maiz garbitu behar da.
Haragi fresko gordina eta urdaiazpiko egosia edo fianbreak, adibidez, behin ontzia irekitakoan, hozkailuan ongi kontserbatuko dira 2-3 egunez, eta 0 ºC-an edukiz gero, luzaroago ere bai. Haragi xehatuak, gehienez ere, egun bat irauten du, eta haragi kozinatuko platerak, gisatuak edo erregosiak, bost egun gehienez.
