Unha guía para coñecer as carnes e os derivados
Fundación EROSKI presenta esta nova Guía Práctica Consumer EROSKI, “Carnes”, que vén sumarse á colección de monografías dedicadas aos alimentos que foi iniciada coa guía “Froitas”, á que seguiron “Hortalizas e verduras” e “Peixes e mariscos”.
Estas obras trasladan ás súas lectoras e lectores coñecementos - útiles e moi aplicables á nosa vida cotiá- sobre os alimentos e son o resultado dun concienzudo e paciente traballo de documentación e produción de contidos realizado polos nosos especialistas en nutrición e gastronomía. Como é norma nas Guías Prácticas Consumer EROSKI, todos e cada un dos textos e gráficos son 100% orixinais, están desenvolvidos en exclusiva para esta guía.
“Carnes” ofrece, como era de esperar, unha detallada descrición das carnes de animais de abasto e das aves de curral. Tamén se fixa na carne de caza e nas exóticas de avestruz e canguro, ademais de produtos de casquería e derivados cárnicos.
A información complétase con datos sobre a produción e consumo de cada tipo de carne, as súas orixes, a descrición das distintas pezas da canle, a súa categoría comercial, as razas máis importantes, consellos para a compra e pautas de conservación das diversas carnes. Descríbense así mesmo, e con minuciosidade, a composición nutricional de cada tipo de carne, as súas características dietéticas máis relevantes e, no seu caso, o papel que poden xogar na prevención ou tratamento de diversas doenzas. Os lectores atoparanse tamén con curiosidades de cada tipo de carne e con abundantes receitas orixinais, saudables e, case sempre, sinxelas de preparar.
Esta guía ten unha peculiaridade: faise nela énfase na conveniencia de controlar a inxesta de carnes e derivados cárnicos. E non porque a carne non sexa un alimento magnífico, que o é, senón porque, no noso país e en xeral en todos os máis desenvolvidos, consómese demasiada carne e derivados cárnicos. Porque a pesar de que sabemos que nos conviría, en termos de saúde, dar máis oportunidades ao peixe como fonte de proteína e incorporalo decididamente á nosa dieta habitual reducindo o consumo de carne e dos seus derivados, seguimos, en xeral, sendo eminentemente carnívoros. As estatísticas revelan que a nosa media de consumo por persoa e día é moi superior ás recomendacións da OMS (Organización Mundial da Saúde): non máis de 3 ó 4 veces por semana e sen exceder os 120 gramos por ración, o que dificulta a moitas persoas levar unha dieta equilibrada baseada en hábitos alimentarios saudables. Ademais, en demasiadas ocasións, a forma de cociñar a carne engade un exceso de graxas que só achega calorías, cando non graxas saturadas, das que estamos sobrados. Os expertos en nutrición e saúde aconsellan reducir a frecuencia de consumo e a xenerosidade das racións de pratos cárnicos na nosa dieta, substituíndoos por peixes e ovos. Tamén recomendan que logremos proteínas de calidade non só mediante estes alimentos senón tamén a través de pratos vexetais como os preparados mesturando legumes e cereais, sen ir máis lonxe, arroz e lentellas.
Para gozar máis e mellor da carne resulta moi útil dispor de información especializada sobre este alimento. Confiamos en que a que che propomos satisfaga as súas expectativas. E axúdeche non só a gozar máis do seu prato favorito senón tamén a consumilo de modo máis conforme co que hoxe sabemos sobre dieta equilibrada e hábitos alimentarios saudables.
Como nas nosas obras anteriores, incluímos un breve test para que lectores e lectoras, ademais de pasar un bo intre cumprimentándoo, poñan a proba os seus coñecementos sobre a carne e o bo ou mal uso que fan dela na súa dieta. Tamén se prestou atención á historia e á xeografía da carne. Acompañan á información catro gráficos: o primeiro ilustra a ruta que percorre a carne desde a granxa até a mesa; o segundo explica a etiquetaxe correcta; o terceiro describe a canle dos animais de vacún, porcino e ovino; e o cuarto axúdanos a ser case uns expertos no despezamento do pito.
Esta Guía Práctica Consumer EROSKI péchase cun cadro que detalla o achegue calórico e a composición nutricional das carnes, un glosario de termos que facilita a boa comprensión dos textos e a bibliografía consultada para elaborar esta obra.
As autoras desta guía son Gema Yoldi e Maite Zudaire. As receitas e os consellos culinarios son cousa de Pedro García, cociñeiro especialista en gastronomía, docente de escolas de cociña e autor das máis de 2.000 receitas dispoñibles no site consumer.é.
Quen traballamos nesta Guía –autores, colaboradores, equipos de coordinación, redacción e supervisión, deseñadores, fotógrafos, etc.- agradecemos en nome de Fundación EROSKI a confianza que depositou en nós. Confiamos en que cumpra as súas expectativas e que lle sexa útil.