Lebre

A lebre é un animal de caza menor que se inclúe na familia do coello. É un roedor de maior tamaño e de pel máis escura e arroxada. A mellor tempada para a súa captura prolóngase durante o outono e parte do inverno, o tempo idóneo para degustar carne de caza salvaxe. A de lebre caracterízase por ser moi aromática. 

A lebre común é orixinaria de Europa. Xa na época dos romanos era moi apreciada e degustábase nos grandes banquetes. Desde Europa, a lebre introduciuse en Arxentina e Nova Zelandia e aos poucos chegou a numerosos países.

Tipo de carne 

A carne de lebre, do mesmo xeito que a maioría de carnes de caza, é unha carne vermella. Estes animais, como viven en liberdade, posúen unha musculatura moi desenvolvida con maior contido en mioglobina que a de animais que se crían en granxas. A mioglobina é un pigmento que contén ferro e confírelle a tonalidade arroxada a estas carnes. A intensidade da cor é proporcional ao contido en ferro da carne e por esta razón a lebre considérase unha carne rica en ferro. Esta tonalidade escura é moito máis intensa que no caso do coello e intensifícase conforme aumenta a idade do animal.